پرس میدیا
بارزانی، ڕاگەهاند، پەیوەندیێن مە دگەل توركیا دمێژوویی و ستراتیژی نە، و ئەم دژی پەكەكێ نە ل شنگالێ و هەر دەڤەرەكا ئەو لێ، وەزیرێ دەرڤەیێ توركیا ژی دوپاتكر "مە بەحسی ئەوان مەتڕسیێن لسەر عێراق و توركیا هەین كر" .
پشتی كو ئەڤروو ڕۆژا پێنچشەمبی، مەسرور بارزانی سەرۆكێ حكومەتا هەرێما كوردستانێ، ب سەرەدانەكێ گەهشتیە ئەنقەرەیا پایتەختێ توركیا، و ژلایێ ڕێڤەبەرێ فڕوكخانەیا ئەتاتورك ڤە هاتیە پێشوازی كرن، پاشان دگەل مەولود چاوشئۆغلۆ وەزیرێ دەرڤەیێ توركیا كۆمبوو .
مەولود چاوشئۆغلۆ، پشتی كۆمبوونێ دكونگرەیەكێ ڕۆژنامەڤانی دا ڕاگەهاند، "دكۆمبوونێ دا دگەل بەرپرسێن هەرێما كوردستان و عێراقێ، مە بەحس ل ئەوان مەتڕسیان كر كو لسەر عێراق و توركیا هەنە، و بابەتێ ئەمنیێ دەڤەرێ، و پەیوەندیێن ئابوری و گوت مە چ كێشەیەك ژی دگەل كوردان ل هەرێما كوردستانێ و باكورێ سوریا نینە".
ئۆغلۆی گوت ژی "پەكەكە و داعش مەتڕسینە بۆ سەر عێراق و توركیا و سوریا".
مەسرور بارزانی سەرۆكێ حكومەتا هەرێما كوردستانێ دهەمان كۆنفڕانسێ ڕۆژنامەڤانی دا ڕاگەهاند، "پەیوەندیێن مە دگەل توركیا مێژوویی و ستراتیژی نە، و مە دگەل جەنابێ وەزیری بەحس ل نیگەڕانیێن هەڤبەش كریە و ئەوان گهوڕینێن ل دەڤەرێ ڕوویداین، و ئەم هەردوو لا دكوك بووین كو ئاشتی و سەقامگیری دبەڕژەوەندیا هەموو خەلكێ دەڤەرێ دایە".
بارزانی گوت ژی "مە دووپاتی ل بەرەڤ پێشبرنا پەیوەندیێن دناڤبەرا خوە دا كرن، وئەم دێ دهاریكاربین بۆ ژناڤبرنا هەر جورە تیرورەكێ، و دەربارەی ڕەوشا سوریا مە نیگەڕانیەكا هەڤبەش هەیە، و ئەزێ دلخۆشم كو توركیا بێ زۆری دێ ئاوارەیان ب سڵامەتی ڤەگەڕینیت".
دبەرسڤا ڕۆژنامەڤانەكێ دا بارزانی گوت "مخابن مە دەستهەڵات ل شنگالێ نینە، و لژێر دەستهەڵاتا هێزێن عێراقێ دایە، بەلێ دڕابردووی دا، ئەم دژی هەبوونا پەكەكێ بووین ل شنگال و دەڤەرێن دی یێن هەرێمێ".
داڕشتن: ئۆمێد حاجی .
No comments:
Post a Comment