پرس میدیا
پارێزەرێ هارون سلێڤانەیی ب پرس میدیا ڕاگەهاند، پشتی بوورینا 5 مەهان ئەڤروو هارون سلێڤانەیی ب كەفالەت هاتە ئازادكرن .
ڕێڤینگ یاسین پارێزەرێ خۆبەخشێ هارون سلێڤانەیی، ب پرس میدیا ڕاگەهاند، دادگەها دهۆكێ، پشتی دڕووینشتنا خوە یا ئێكێ دا بەریا مەهەكێ ئەنجامدای و پاشان پاشخستی، ئەڤروو دڕووینشتنا خوە یا دووێ دا بڕیار دا هارون سلێڤانەیی ب كەفالەت بهێتە ئازادكرن .
ئاماژە ب ئەوێ چەندێ ژی كر، "هەر چەندە مە بەڵگە هەبوون، كو ئەو تۆهمەتێن لسەر هارونی ڕاست نینن، و دادگەهێ بخۆ ژی باوەری ب وان تۆهمان نەبوو، بەلێ هارون سلێڤانەیی ب 6 ملیۆن دینارێن عێراقی هاتە سزادان، دگەل هەژمارتنا ڕۆژێن وی یێن زیندانێ و پاشان هارون سلێڤانەی ب كەفالەت هاتە ئازادكرن".
پارێزەر ڕێڤینگ، دوپاتكر، "ئەم ب ئەڤێ بڕیارا دادگەهێ ڕازی نینین، و دێ تەمیز كەین".
هەروەسا گوت ژی: ژ كۆیێ 11 كەیسێن لسەر هارونی هاتینە ڤەكرن، ئەڤروو 6 ئێك لا بوون، و ل 10ێ ئەڤێ مەهێ دێ ڕووینشتنەك لدور كەیسێن مایی هێتەكرن .
هارون سلێڤانەی، كۆمیسەرێ پولیسێن زاخۆیە، و بەریا 5 مەهان، دئەركێ خوە دا ژلایێ ئاسایشا زاخۆ ڤە هاتە دەستەسەركرن، و پاشان بۆ چاكسازیا مەزنان ل دهۆكێ هاتە ڤەگوهاستن، و كەیسێن وی ڕادەستی پۆلیسان هاتنە كرن، ئەو تۆمەتێن بۆ هارونی هاتینە ئاراستەكرن، ب گشتی بریتی بوون ژ بەڵاڤكرنا چەندین ئاخڤتنان ب چەند كەسایەتیێن حكومی و حزبی دڤەیسبۆكی دا .
داڕشتن: ئۆمێد حاجی .
No comments:
Post a Comment