پرس میدیا
دادگه‌ها مافێن مروڤى یا ئه‌وروپا، ژبه‌ر ده‌ستسه‌رداگرتنا زانیاریێن ئه‌لكترونى یێن پارێزه‌رێن ئوجه‌لانى، توركیا سزادا.
ئه‌ڤرو روژا چارشه‌مبى، ئاژانسا فورات نیوز به‌لاڤكریه دادگه‌ها مافێن مروڤى ل ئه‌وروپا، ب ئه‌گه‌رێ ده‌ستسه‌رداگرتنا زانیاریێن ئه‌لكترونى یێن پارێزه‌رێن عه‌بدولا ئوجه‌لان، رێبه‌رێ پارتا كرێكارێن كوردستانێ (په‌كه‌كه) كو په‌یوه‌ندى ب "پارێزه‌ر - بریگرته" وه‌ك نهێنیا پیشه‌ى دپارێزیت و لسه‌ر پێنه‌دانا وان و ژناڤبرنا وان، توركیا سزادا
دادگه‌ها ئه‌وروپا دیاركر ژى، ئه‌ڤ كاره د كومه‌لگه‌هه‌كا دیموكراتى پێدڤى نینه و "توركیا په‌یمانا مافێن مروڤى یا ئه‌وروپى وه‌ك د ماده‌یا هه‌شتێ دا هاتیه "پێدڤیه رێز ل ژیانا تایبه‌ت، یا مروڤى و دانوستاندنا بهێته گرتن" بنپێكریه.
سزایێن دادگه‌ها مافێن مروڤى یا ئه‌وروپا بڤى شێوه‌ى نه : ده‌وله‌تا توركیا دێ هێته سزادان ب دانا سێ هزار و 500 یورویا بو هه‌ر ئێك ژ پارێزه‌رێن ئوجه‌لانى ئه‌وێن سكالا تومار كرى و سێ هزار یورو ژى وه‌ك خه‌رجیا دادگه‌هێ بده‌ته دادگه‌ها مافێن مروڤى یا ئه‌وروپا".
عه‌بدولا ئوجه‌لان، دامه‌زرێنه‌ر و رێبه‌رێ په‌كه‌كێ ل 15/2/1999 د پێلانه‌كا نیڤده‌وله‌تى دا ل نه‌روبى یا پایته‌ختێ كینیا هاته ده‌سته‌سه‌ركرن و راده‌ستكرن بو توركیا، ژ وێ روژى تا نها د دورگه‌یا ئیمرالى ل توركیا زیندانكریه.
No comments:
Post a Comment