پرس میدیا
شاندەکێ سەرۆکایەتیا هەرێمێ بۆ بەشداریکرن ل کۆڕبەندێ ئابووریێ داڤۆس، بەلێ ژبلی پارتی، چ ئەندامەکێ ئێکەتی و پارتێن دی دگەل ئەوی شاندی نینن .
دوهی ڕۆژا سێشەمبی کۆڕبەندێ ئابووریێ داڤۆس ل سویسڕا ب بەشداریا سەرۆك و نوینەرێن چەندین وەڵاتان دەست بکارێن خۆ کر، و شاندەکێ پێنچ کەسی ب سەرۆکایەتیا نێچیرڤان بارزانی وەك شاندێ هەرێما کوردستانێ دوی کۆڕبەندی دا بەشدارن .
شاندێ هەرێمێ ب سەرۆکایەتیا نێچیرڤان بارزانی سەرۆکێ هەرێما کوردستانێ، و هەر ئێك ژ ( فەلاح مستەفا، سەفین دزەیی، فەوزی حەریری و دگەل دوو کەسێن دی ) پێکدهێت، و دکۆمبوونان دا بەشداردبن، بەلێ هەموو ئەو ئەندامێن شاندی و ب سەرۆکێ هەرێمێ ژی ڤە، سەر ب پارتی دیمۆکراتی کوردستانن، و چ ئەندامەکێ ئێکەتی و گۆڕان و پارتێن دی دگەلدا نینن .
ئەڤە ددەمەکی دایە، سەرۆکێ هەرێمێ دوو جێگر هەنە، ئێك سەر ب ئێکەتیە، و ئێك سەر ب گۆڕانە، و چەندین ڕاویژکار و ئەندام ل سەرۆکایەتیا هەرێمێ سەر ب ئێکەتی نە، بەلێ هیچ ئەندامەکێ ئێکەتی دوی شاندی دا بەشدار نینە .
دهەمان دەمدا، بەرهەم سالح سەرۆك کۆمارێ عێراقێ، ب سەرۆکایەتیا شاندەکێ عێراقێ بەشداری دکۆڕبەندێ داڤۆس دا کریە، هەر چەندە بەرهەم سالح بەریا نها جێگرێ سکێرتێرێ گشتیێ ئێکەتی بوو، و نها ژی ئەندامێ ئەنجومەنێ گشتیێ سەرکردایەتیا ئێکەتیە، بەلێ دناڤ شاندێ وی ژی دا، هیچ ئەندامەکێ ئێکەتی ناهێتە دیتن، بەلێ فۆئاد حسێن کو سەر ب پارتیە دوی شاندی دا بەشدارە .
دهەمان دەمدا، پێشواز فەیزۆڵا کو دبنەرەت دا کوردە، ئەندامێ تیما پڕۆتۆکۆڵا دۆناڵد تڕامپ سەرۆك کۆمارێ ئەمریکایە .
داڕشتن: ئۆمێد حاجی
No comments:
Post a Comment