پرس میدیا
چاڤدێره‌كێ سیاسى ب پرس میدیا ڕاگه‌هاند، ئێران یا ئاماده نینه شه‌ڕێ ڕاسته‌وخۆ دگه‌ل ئه‌مریكا بكه‌ت، چونكه نها دڕه‌وشه‌كا ئاڵۆزا ئابوورى و سیاسى دایه، شه‌ڕكرن ژى دگه‌ل ئه‌مریكا خۆ كوشتنه .
زێره‌ڤان به‌روارى، مامۆستایێ زانینگه‌ها سارى یا بڕیتانى و چاڤدێرێ سیاسى، ب پرس میدیا ڕاگه‌هاند، "پشتى كوشتنا قاسم سوله‌یمانى دێ قۆناغه‌كا نۆیا سیاسى ل ده‌ڤه‌رێ ده‌سپێكه‌ت، و ئه‌ڤ پێشهاتێن نۆى و هه‌ڤڕكیێن سیاسیێن ئه‌مریكا و ئێرانێ بۆ سه‌ر ئه‌منیه‌تا ڕۆژهه‌لاتا ناڤه‌ڕاست جهێ مه‌تڕسیێنه".
ئاماژه ب ئه‌وێ چه‌ندێ ژى كر، "ئه‌مریكا ڤیایه ب كوشتنا قاسم سوله‌یمانى كو پێگه‌هه‌كێ گرنگ ل ڕۆژهه‌لاتا ناڤین هه‌بوو، هه‌ژموونا ئێرانێ ل ده‌ڤه‌رێ كێم بكه‌ت" .
به‌روارى گوت ژى، "كارڤه‌دانێن ئێرانێ به‌رامبه‌ر ئه‌مریكا زێده‌تر دێ ب ڕێكا شه‌ڕێ وه‌كاله‌ت بیت، و لێدان ل به‌ڕژه‌وه‌ندیێن ئه‌مریكا ل ده‌ڤه‌رێ، به‌لێ ئێران یا ئاماده نینه شه‌ڕێ ڕاسته‌وخۆ دگه‌ل ئه‌مریكا بكه‌ت، چونكه نها دڕه‌وشه‌كا ئاڵۆزا ئابوورى و سیاسى دایه، شه‌ڕكرن ژى دگه‌ل ئه‌مریكا خۆ كوشتنه" .
لدور كارڤه‌دانێن عێراقێ، زێره‌ڤان به‌روارى گوت، "نها عێراق دلاوازترین ڕه‌وشا سیاسى دایه، و نه‌شێت بڕیارا خۆ یا سیاسى هه‌بیت، له‌وان ژى چ كارڤه‌دانه‌كا ب كریار نابیت".
به‌روارى ئه‌ڤ ڕه‌وشه بۆ كوردان ب مه‌تڕسى دا زانین، ژ ئه‌گه‌رێ زێده‌بوونا هه‌ڤڕكیان دده‌مێن بهێت دا و نه‌شیانا كوردان بۆ ڕاگرتنا باڵانسا سیاسى، و گوت ژى، "به‌شداریا شاندێن لایه‌نێن سیاسیێن كوردى ل پرسه‌یا سوله‌یمانى یا چاڤه‌ڕێكرى و نۆڕمال بوو، بۆ پاراستنا باڵانسێ، و به‌شدارینه‌كرنا شاندێ حكومه‌تێ ژى ب فه‌رمى سه‌لماندنا ڕاگرتنا باڵانسێ یه ژلایێ كوردان ڤه دڤێ قوناغێ دا".
داڕشتن: ئۆمێد حاجى
No comments:
Post a Comment