گوته‌بێژێ حكومه‌تا هه‌رێما كوردستانێ راگه‌هاند، د په‌یوه‌ندیه‌كا تله‌فونی دا سه‌رۆك وه‌زیرێن هه‌رێما كوردستانێ و سه‌رۆك وه‌زیرێن عیراقێ ل سه‌ر چه‌ند پێنگاڤه‌كێن سه‌ره‌كی بو به‌ره‌ڤ چاره‌سه‌ركرنا ئاریشه‌یان رێككه‌فتن.
جوتیار عادل گوته‌بێژێ حكومه‌تا هه‌رێما كوردستانێ د راگه‌هاندنه‌كێ دا ئاشكراكر، بریار هاتیه دان ل گۆڕه‌ی ره‌وشا دارایا نها یا عیراقێ، ل نێزیكترین ده‌مدا به‌غدا وێ كوژمێ 320 ملیار دیناران وه‌كو به‌شێ بودجه‌یێ هه‌رێمێ ژ بوی هه‌ولێرێ فرێكه‌تن.
د هه‌مان به‌لاڤكریێ دا هاتیه، رۆژا شه‌مبیێ د په‌یوه‌ندیه‌كا تله‌فونی دا، مه‌سرور بارزانی سه‌رۆك وه‌زیرێن هه‌رێما كوردستانێ و مسته‌فا كازمی سه‌رۆك وه‌زیرێن عیراقێ، ئاریشه‌یێن دناڤبه‌را هه‌ولێر و به‌غدایێ دا گوتوبێژكرینه.
د به‌شه‌كێ ئه‌وێ راگه‌هاندنێ دا هاتیه، د وێ په‌یوه‌ندیا تله‌فونیدا ته‌كه‌ز لسه‌ر ئه‌وێ یه‌كێ هاتیه كرن كو ده‌ستورێ عیراقێ بنه‌مایێ چاره‌سه‌ركرنا هه‌مو ئاریشه‌ییانه و هه‌ر رێككه‌فتنه‌كێ دڤێت تایبه‌تمه‌ندیێن هه‌رێما كوردستانێ لبه‌ر چاڤ بهێنه وه‌رگرتن و د به‌رژه‌وه‌ندیا هه‌مو گه‌لێ عیراقێ دا بیت.
ئه‌ڤه د ده‌مه‌كێ دایه بو ده‌ما زێده‌تر ژ دوو مه‌هانه حكومه‌تا هه‌رێما كوردستانێ مووچه‌یێ فه‌رمانبه‌ران دابه‌شنه‌كریه و ب وێ سه‌ده‌مێ پزیشك و فه‌رمانبه‌رێن ته‌ندروستی ل پارێزگه‌ها سلێمانیێ بایكوتا ده‌وامێ راگه‌هاندنه.
No comments:
Post a Comment