پرس بادینی
ئه‌ڤرۆ ئه‌رشه‌د سالحی، سه‌رۆكێ به‌ره‌یێ توركمانی راگه‌هاند، ئه‌م دێ ب هه‌مو ره‌نگا بزاڤا كه‌ین داكو رێگریێ ل رێككه‌فتنا هه‌ماهه‌نگی یا هه‌ڤبه‌ش دناڤبه‌را سوپایێ عیراقێ و پێشمه‌رگه‌ی دا بكه‌ین.
ساڵحی گوت ژی، دناڤبه‌را هه‌ولێر و به‌غدایێ دا هنده‌ك به‌رژوه‌ندیێن سیاسی هه‌نه، ژ بوی گه‌هشتنا وان به‌رژه‌وه‌ندیان پێتڤی دكه‌ت هێزێن پێشمه‌رگه‌ی ڤه‌گه‌رنه كه‌ركوكێ، به‌لێ ئه‌م وه‌كو توركمانی دێ هه‌مو بزاڤان كه‌ین داكو رێگریێ ل وێ رێككه‌فتنا هه‌ماهه‌نگیا هه‌ڤبه‌ش بكه‌ین ئه‌وا دناڤبه‌را عیراق و هه‌رێما كوردستانێ دت.
ئاماژه ب وێ یه‌كێ ژی كر، ئه‌م وه‌كو پێكهاتێن توركمان و عه‌ره‌ب بێده‌نگ نابین به‌رامبه‌ر فه‌راموشكرنا مه ل پێناڤ به‌رژه‌وه‌ندیێن سیاسی دناڤبه‌را عیراق و هه‌رێمێ دا، دنهادا ئه‌ڤ باژێره ژ روویێ ئاسایشێ ڤه جیگره و پێتڤی ب چو هێزێن ژ ده‌رڤه نینه، ژبه‌ر وێ یه‌كێ ئه‌م رێكێ ب ڤه‌گه‌ریانا ره‌وشا به‌ری 2017ێ ناده‌ین.
بریاره هێزێن پێشمه‌رگه‌ی و سوپایێ عیراقێ ژ بوی داگرتنا بوشای یا ئه‌منی ئه‌وا ل ناوچه‌یێن كوردستانێ یێن ژ ده‌رڤه‌ی هه‌رێمێ چوار ناڤه‌ندێن هه‌ڤبه‌ش و هه‌ماهه‌نگ ژ بوی پێكڤه‌كاركرنێ ڤه‌كه‌نه‌ڤه.
رۆژا ئێك شه‌مبی 23ی ئابا 2020ێ خالد مه‌فره‌جی، په‌رله‌مانتارێ عه‌ره‌بێ كه‌ركوكێ و ئه‌رشه‌د ساڵحی، په‌رله‌مانتارێ توركمانی ل كه‌ركوكێ و سه‌رۆكێ به‌ره‌یێ توركمانی عیراقی، دژی ڤه‌كرنا ناڤه‌نده‌كا هه‌ماهه‌نگ ل پارێزگه‌ها كه‌ركوكێ، یاداشته‌كا هه‌ڤبه‌ش یا نه‌رازیبونێ دایه ده‌ستێ سه‌عه‌ت عه‌ره‌بیه، فه‌رماندارێ باره‌گایێ پێشكه‌فتی یێ فه‌رماندا ئۆپه‌راسیۆنان ل كه‌ركوكێ.
No comments:
Post a Comment