ئه‌ندامه‌كێ فڕاكسیونا هه‌ڤپه‌یمانیا فه‌تح ل جڤاتا نوینه‌رێن عیراقێ راگه‌هاند، ل حه‌فتیا بهێت جڤاتا نوینه‌ران وێ روینشتنا خوه ده‌ست پێبكه‌تن ده‌رباره‌ی ته‌مامكرنا یاسایا هه‌لبژارتنان.
ئه‌حمه‌د عه‌لی حسێن ئه‌ندامێ هه‌ڤپه‌یمانیا فه‌تح د لێدوانه‌كێ دا ئاشكراكر، چه‌ند رۆژه‌كان ژ به‌ری نها جڤینه‌ك ل مالا محه‌مه‌د حه‌لبوسی سه‌رۆكێ جڤاتا نوینه‌رێن عیراقێ هاتبو رێكخستن ژ بوی گوتوبێژان ده‌رباره‌ی بازنه‌یێن هه‌لبژارتنان.
ئاماژه ب وێ یه‌كێ ژی كر، ره‌نگه به‌ریا رێكخستنا روینشتنا داهاتی یا جڤاتا نوینه‌ران، رێككه‌فتن ل سه‌ر ئێكلاكرنا بازنه‌یێن هه‌لبژارتنان وه‌ره كرن.
ئه‌حمه‌د عه‌لی راگه‌هاند ژی، ل حه‌فتیا بهێت جڤاتا نوینه‌ران وێ روینشتنێ لسه‌ر ته‌مامكرنا یاسایا هه‌لبژارتنان ده‌ست پێبكه‌تن و گوت ژی "سه‌ده‌ما پاشخستنا رۆنشتنا جڤاتا نوینه‌ران ژ بوی توشبونه‌ا ژماره‌یه‌كا زێده‌یا فه‌رمانبه‌ر و ئه‌ندامێن جڤاتا نوینه‌ران ب ڤاروسێ كۆرۆنایێ ڤه‌دگه‌رینه".
دووهی دوو شه‌مبی حه‌سن جیهاد شیره‌تكارێ سه‌رۆك كومارێ عیراقێ راگه‌هاندبوو، سه‌رۆك كوماری پشته‌ڤانیێ ل ئه‌نجامدانا هه‌لبژارتنێن به‌روه‌خت دكه‌ت و ژ به‌ر وێ یه‌كێ داخواز ل جڤاتا نوینه‌ران كریه له‌زێ د په‌سه‌ندكرنا یاسایا هه‌لبژارتنان دا بكه‌ن.
به‌ریا نها مسته‌فا كازمی سه‌رۆك وه‌زیرێن عیراقێ راگه‌هاندبوو، شه‌شی حوزه‌یرانا سالا 2021 هه‌لبژارتنێن به‌روه‌خت وێ ل عیراقێ ب ریڤه بچن و ئاشكراژی كربوو دگه‌ل سه‌رۆك كوماری و سه‌روكێ جڤاتا نوینه‌ران رێككه‌فتیه لسه‌ر ده‌نگدان ژ بوی یاسایا هه‌لبژارتنێن به‌وه‌خت د ئێكه‌م رۆنشتنا داهاتی یا جڤاتا نوینه‌ران دا و شاندنا وێ ژ بوی سه‌رۆك كوماری بو وێ یه‌كێ په‌سه‌ند بكه‌تن.
No comments:
Post a Comment