پرس بادینی
رێكخراوا ته‌ندروستیا جیهانی نڤیسینگه‌ها خوه دناڤا وه‌زاره‌تا ته‌ندروستیا هه‌رێما كوردستانێ دا ل هه‌ولێرێ ڤه‌كر و كومه‌كا پێتڤیێن پزیشكی پێشكێشی وه‌زاره‌تا ته‌ندروستیا هه‌رێمی كر.
د وێ ده‌ربارێدا خاڵس قاسم رێڤه‌به‌رێ گشتیێ دیوانا وه‌زاره‌تا ته‌ندروستیا هه‌رێما كوردستانێ راگه‌هاند، ڤه‌كرنا ڤێ نڤیسینگه‌هێ ژ بوی مه‌ره‌ما هه‌ماهه‌نگیه‌كا زێده‌تر دناڤبه‌را وه‌زاره‌تا ته‌ندروستی و وێ رێكخراوێ دایه ژ بوی كارئاسانی و هه‌ڤكاریكرنا وه‌زاره‌تا ته‌ندروستی، ب تایبه‌تی ژی ژ بوی كارێن پێتڤی ژ بوی به‌ره‌ڤانیكرنێ ل ڤایرۆسێ كۆرۆنایێ.
خاڵس قاسم گوتژی "هه‌تا نها ئه‌ڤێ رێكخراوی چه‌ندجاران هه‌ڤكاریا مه كریه ب فرێكرنا پێتڤییان چ كیت بن یان ژی به‌شه‌كێ دن ژ پێتڤیان ژ بوی به‌ره‌ڤانیكرن ل ڤایرۆسێ كۆرۆنایێ، دوهی ژی شه‌ش ئه‌مبولانسێن دن پێشكێشكرن وه‌كو به‌شه‌ك ژ هه‌ڤكاریان كو ب هاریكاریا نه‌ته‌وه‌یێن ئێكگرتی و ویلایه‌تێن ئێكگرتی یێن ئه‌مریكا په‌یداكربون".
رێڤه‌به‌رێ گشتیێ دیوانا وه‌زاره‌تا ته‌ندروستیا هه‌رێما كوردستانێ ده‌رباره‌ی وێ یه‌كێ كو ڤه‌كرنا نڤیسینگه‌ها ڤێ رێكخراوی وێ چ ل ڤێ ره‌وشا روبرووبونا كۆرۆنایێ ل هه‌رێما كوردستانێ بگهوریت گوت "هه‌ماهه‌نگی و هه‌ڤكاری وێ ب له‌زتربن، مفا وه‌رگرتن ل ئه‌زمونا ڤێ رێكخراوێ د رووبرووبونا ڤایروسی دا وێ بله‌زتر و باشتر بیت ژ بوی مه".
No comments:
Post a Comment