شڤان سه‌عید یه‌ك ژ گرتیێن دهوكێ په‌یوه‌ندی ب مالباتا خوكریه
نێزیكی نیڤرۆیا ئه‌ڤرۆ یه‌ك ژ گرتیێن دهوكێ په‌یوه‌ندی ب مالباتا خۆكر و داخوازا هاریكاریێ ژ ده‌یك و بابێن خۆ كر.
حه‌جی سه‌عید به‌رۆژكی بابێ شڤان سه‌عید یه‌ك ژ گرتیێن بادینان، بۆ پرس میدیا ڕاگه‌هاند، ئه‌ڤرۆ نێزیك ده‌مژمێر 12:30 خوله‌كێن نیڤرۆ كورێ وی په‌یوه‌ندی پێكریه و پرسیارا ره‌وشا زارۆكێن خۆ مالباتا خۆ كریه.
حه‌جی سه‌عید ئاماژه ب وێیه‌كێ ژی كر، كورێ وی ئه‌و هه‌می ده‌نگۆیه ره‌تكرنه كۆ دناڤا زیندانێدا هاتبن ئازاردان، و دبێژیت، ره‌وشا وان یاباشه و ل نێزیك دادگه‌هـ دێ بریارا داویێ لسه‌ر چاره‌نڤێسێ وان ده‌تن.
دپه‌یوه‌ندیا خۆ دا شڤان سه‌عید كو هه‌ڤده‌م كارگێرێ ده‌ڤه‌را دهوكا هه‌ڤپه‌یمانیا نشتیمانیه گوتیه، كۆ ئه‌و گه‌له‌ك ژ زارۆكێن خۆ غه‌ریب بوویه و داخواز ل بابێ خوكریه چاڤێ خۆ بده‌نه زارۆكێن وی، و هه‌ڤده‌م داخوازا هاریكاریێ ژ بابێ خوكریه.
ل داویێ ژی حه‌جی سه‌عید داخوازا ئازادكرنا هه‌می گرتیان دكه‌ت و دبێژیت كۆرێ من بێ تاوانه و پێتڤیه دادگه‌هـ بێ لایه‌نگری بریارێ لسه‌ر چاره‌نڤێسێ وی و هه‌می وان گرتیا بده‌ت و هه‌می بهێنه ئازادكرن، چونكه ره‌وشا ده‌رونیا زارۆكێن وان نه‌یاباشه.
پشتی زێدەتر ژ دوو مه‌هان ژ ده‌سته‌سه‌ركرنێ بۆ یه‌كه‌م جار په‌یوه‌ندی ب مالباتا خۆ كریه، ئه‌ڤه‌ژی پشتی وێیه‌كێ دهێت به‌شه‌ك ژ چالاكڤانێن سڤیل و رۆژنامه‌ڤان ل سنورێ پارێزگه‌ها دهۆكێ ژ ئالیێ ده‌زگه‌هێن ئەولەهیێ ڤه هاتنه ده‌سته‌سه‌ركرن و هه‌تا نها چاره‌نڤێسێ وان نه‌دیاره، رێك ب پارێزه‌ر و مالباتێن وان ژی ناهێته دان ده‌سته‌سه‌ركریان ببینن.
No comments:
Post a Comment